Historia til huset - ei tidslinje
1913
Ludwig Wittgenstein leigde husvære i Skjolden sentrum hos postmeister Klingenberg.
Her gjorde han forarbeida til det første hovudverket hans som seinare fekk namnet Tractatus Logico-Philosophicus. Samstundes teikna og planla han sitt eige hus i Skjolden.
1914
Huset sto ferdig hausten 1914.
Huset vart plassert 45 meter over Eidsvatnet med utsyn til bygda Skjolden. Wittgenstein ønskte arbeidsro, og då måtte han vera langt frå folk og så utilgjengeleg som mogleg. Plassen fekk på folkemunne namnet “Østerrike“.
1958
Huset vart flytta til Bolstadmoen i Skjolden.
Her vart det bygd oppatt med nokre endringar. Største endringene var nytt inngangsparti, veggane vart kledd med eternittplater og taket vart snudd 90 grader.
2014
Stiftinga Wittgenstein i Skjolden etablert 20. juni 2014.
Luster kommune har kjøpt tomta. Huset skal attende til den intakte grunnmuren. Nye generasjonar skal få oppleve arbeidsplassen til Wittgenstein og sjølve bli inspirerte til å bryte eigne tankar.
2021
Huset og området i kring freda, formalisert ved arrangement 13. mai 2022 grunna korona-pandemien.
2017-2019
Huset vart demontert hausten 2017, attreist i 2018 og innviingsmarkering i 2019 med 2-dagars arrangement.
Sjølv om huset vart fysisk endra i 1958, var det elles godt intakt. Eternitt-veggplatene hadde teke vare på veggane dei 60 åra som var gått. Arbeidarane kunne derfor relativt lett restaurera huset attende til 1914-utgåva. Huset vart først oppattbygd i eit stort lagerhus i bygda, så demontert og ført opp direkte på staden.